నీతి సూక్తి | తెలుగుబంధు( తెలుగుప్రజల ఆత్మబంధు )

నీతి సూక్తి | తెలుగుబంధు( తెలుగుప్రజల ఆత్మబంధు )

                                                                      

 తలతున్ భక్తజనావనునున్ గజముఖున్ దాంతున్ దయాస్వాంతునిన్

     కలుషారణ్యదవానలున్, వరదు రాగద్వేష దు:ఖాంతకున్

      తొలిపూజల్గొనువాని భక్త సులభున్  దోషాపహున్ సర్వ  వి

      ద్యలు సౌభాగ్యము లిచ్చునట్టి నెఱదాతన్ శ్రీ గణాధీశ్వరున్ !

                  శ్రీ గణనాయకా వరద సిద్ధి వినాయకా ఆదిపూజితా

                  ఆగమవందితా సురగాణార్చిత విఘ్న వినాశకారణా

                  వేగమె నాతలంపు నెరవేర్పర బాలశశాంక భూషణా

                  భోగి బిభూషణా సుజన పోషణ భూరి భవాబ్ది శోషణా!

 

                                    శ్రీవెంకటేశ్వర భక్తిమాల         రచన : శ్రీ వడ్డూరి అచ్యుతరామ కవి

                                                                        

ఎన్నిమారులు చూచిననేమొగాని

తనివిదీరదు నీదివ్య దర్శనంబు

చూచినను చూచుచున్నను చూడగోరు

చూపుమికెప్పుడు నీదివ్య రూపమభవ !

శ్రీ మద్వెంకట శైలమందు విభవ శ్రీ మీర నాంచారియున్

భామారత్నము మంగమాంబయును సంభావించి సేవింపగా

కామారాతి మహేంద్ర ముఖ్యులు నుతుల్ గావింప భక్తాలికిన్

సేమంబుల్ సమకూర్చు దేవు గొలుతున్ శ్రీ వెంకటేశప్రభున్ 

నరక మురాదిదానవ వినాశనకారికి దుఃఖహారికిన్

గరుడవిహారికిన్ మహిత కౌస్తుభధారికి చక్రధారికిన్

దురిత విదారికిన్ జనన దుఃఖనివారక నామధారికిన్

తిరుమల వెంకటేశు నకు దేవరకున్ శరణా ర్ధి నయ్యెదన్!

పంకజాసన వాసవార్చిత భక్తలోక శుభంకరా !

వేంకటాచలవాస! కేశవ విస్వకారణ శ్రీధరా!

శంకరార్చిత పాదపంకజ శంఖచక్ర గదాధరా !

వేంకటేశ్వర! వేంకటేశ్వర ! వేంకటేశ్వర ! పాహిమాం !!

పరమపావన భక్త జీవన పాపకానన దాహనా !

గరుడవాహన లోకమోహన కంజ సన్నిభ లోచనా!

శరధి శయన రమా మనోహర సర్వలోక నియామకా!

తిరుమలేశ్వర వేంకటేశ్వర దీనరక్షక రక్షమాం !!

శ్రీకరంబగు వేంకటాచల శిఖరమందు   వసించుచున్

ప్రాకటంబుగ భక్తులను గాపాడుచుందువు దేవరా !

నీకు మ్రొక్కెద బ్రోవవే నను నీలనీరద వర్ణ లో

కైక నాయక వేంకటేశ్వర గరుడవాహన శ్రీహరీ !!

శ్రీ సుర్యభగవానుని స్తోత్రం

                                                        ఓం శ్రీ సవిత్రే నమః 
శా .    ఓంకారంబున  సంభవించు జగమాయోం కార మందమత మౌ 
        నోంకారంబునవృద్ధిజెందు సలంబొంకారమై యొప్పు నా 
        యోంకారాకృతి యై వెలింగెడి పరం జ్యోతిన్ పరబ్రహ్మమున్ 
        ఓంకారప్రణవ స్వరూపునకు దేజోమూర్తికిన్ మ్రొక్కెదన్ .
ఉ .   శ్రీయుననా మయం బయిన జీవన మాయువు నాత్మ విద్యయున్ 
        బాయని ప్రేమ నిత్తువట భక్తులకున్ జగదీశ సర్వదా 
        నాయెడ సత్కృపన్ గలిగి నాస్తవమున్ దయ స్వీకరించి నన్
        శ్రీ యుతమూర్తి బ్రోవగదె చిత్తమునన్ వసియించి భాస్కరా !
చ.    సరసిజబాంధవా!నిగమసన్నుత!దీనశరన్య!మౌనిఖే 
        చరగరుడోరగ ప్రముఖ సన్నుత భక్త జనావనా శుభం 
         కర శరణంటి బ్రోవగదె కాలనియామక, కాల రూప! యో 
         హరిహర ధాతృ తేజ!పరమాత్మ!దయానిధి!దేవ!భాస్కరా!
మ.    వికలాంగుల్ జడులంధులున్ బధిరులున్ విశ్వాత్మకంబై న నీ 
          యకలంకోత్తమ దివ్య నామమును నిత్యంబున్ స్మరింపన్ భువిన్ 
         సకలారిష్టము లంతరింప శుభముల్ సౌఖ్యంబులన్ బొంది పా 
         యకస్వర్గంబును గాంతు రంతమున దేవా!సూర్యనారాయణా!
శా .   త్రే తాగ్నుల్ చతురాగమంబులు ధరిత్రిన్ బంచ భూతంబు లున్ 
         శీతోష్ణాది విబేధ కాల ఋతువుల్ శీతాంశులు గ్రంశులున్ 
         వాలో ద్దూత మహోగ్ర వృష్టి విలయ వ్యాపార సృష్టి స్టితుల్
         భూతేశా!భువి నీవ!నీవలన వే బోల్పోందు నో భాస్కరా !
మ.    నర దేవాసుర మౌని దివ్యు లేవరైనను గాని నీ రాకచే 
          నురు కర్తవ్యము,కాలకృత్యములు,సంధ్యో పాసనల్ సేయుచున్ 
           ధరలో జీవితయాత్ర సల్పుదురు నిన్ దర్శింప లేకున్న నె 
          వ్వరు కర్తవ్య మెరుంగ లేరుగద !దేవా ! సూర్యనారాయణా !
మ.     మహనీయుల్ ఋషులున్,ద్విజుల్ బుధవరుల్ మార్తాండ నిన్భక్తి తో 
           గ్రహరాజా !భవదీయ దర్శన మె దన్ గాంక్షించి పూతాత్ములై 
           బహు మంత్రోక్తుల నర్ఘ్య  పాద్యములతో "బ్రహ్మార్పణం"బంచు నిన్ 
           బహురీతిన్ ప్రచిం చు చుందురు పరబ్రహ్మ స్వరూపా !రవీ !                    

                        శ్రీ ఆంజనేయ దండకం

                రచన వడ్డూరి అచ్యుతరామ కవి

శ్రీ అంజనాదేవి సత్పుత్ర! సుగ్రీవమిత్రా! సునేత్రా!సుగాత్రా!విచిత్ర  క్రియా దివ్య సంస్తుత్య చారిత్ర !శ్రీ ఆంజనేయా !మహా కాయ !శ్రీ వాయు పుత్రా !భవన్నామముల్ భక్తి ధ్యానించు వారిన్  సదా బ్రోచిరక్షించు కారుణ్య చిత్తుండ వంచున్ స్వబుద్ధిన్ విచారించి  ధీరత్వ మొప్పారనే కార్య మైనన్ ఫల ప్రాప్తి సేకూర సంపూర్తి గావిమపగా నేర్చువీరాగ్ర గణ్యుండవంచున్ మహా బుద్ధిమంతుండ వంచున్ జగంబందు దుస్టాత్ములన్ ద్రుంపగా రుద్ర తేజంబుతో సర్వ శక్తుల్ మహా మూర్తిగా రూపు గొన్నట్టి సద్భక్త చింతామణీ !యార్త రక్షామణీ !రామ భక్తాగ్రణీ ! దైవచూడామణీ! నిన్ను నే నెప్పుడున్ భక్తిధ్యా నింతునో కీశ వంశాగ్రణీ! రామశుగ్రీవ సఖ్యంబు సాధించి యా రాము నాజ్ఞన్ వెసన్ జానకీదేవి గానంగ దుర్లంఘ్యమౌ దక్షిణాంభోనిధిన్ దాటి లంకాపురిన్ జేర నాటంకముల్  గూర్చు ఛాయాగ్ర హానేక దోషాచర శ్రేణి బోకార్చి లంకన్ బ్రవేశించి !యాలంకిణిన్ గూల్చి లంకాపురంబెల్ల గాలించి యా జానకీ దేవినిన్ గాంచి శ్రీ రామ చరిత్రమున్ దెల్పి యాయుంగరం బానవాలిచ్చియాననందమున్ గూర్చి శ్రీ జానకీ భూషణంబైన చూడామణిన్జానకీ వార్తగా భద్రమున్ జేయుచున్ దూత కృత్యంబు సాధించి లంకేసునిన్ గాంచి శ్రీరాము దివ్య ప్రభావంబు దెల్పంగ నూహించి నీ వాయసోకాటవిన్  పుష్పవృక్షాదులన్ గూల్చి అక్షాదులన్ జెండి లంకాపురిన్ గాల్చి వేవేగ శ్రీ రామునిన్ జేరి సీతామహాదేవి క్షేమంబు విన్పించి యానంద మున్ గూర్చి లోకంబునం దేవ్వరన్ జేయలేనట్టి శ్రీ రాము కార్యంబు సాధించి యున్నట్టి నీచిత్ర చారిత్ర మెన్నంగ నీ దేహముప్పొంగ నానందమున్ జెంది నిన్గొల్చు భక్తాలి గాపడుదో దేవ! శ్రీ కేసరీపుత్ర!సౌమిత్రి ప్రాణంబు నిల్పంగ సంజీవినిన్ దెచ్చు నానాటి నీ యా మహా శక్తి యుక్తి ప్రభావంబు లేన్నన్ మహా చిత్రముల్ గాదె నీ కార్య నిర్వాహ కొద్యోగ చాతుర్యముల్ వర్ణనా తీతముల్ దేవ!నీ శక్తి నీవే గ్రహింపంగ లేరందురన్యుల్ గ్రహింపంగ తామెంత ధీమంత! శ్రీ వీర హనుమంత! నీయంతవారీ యనంతావనిన్ లేరు నిన్ బ్రస్తుతింపంగ నే నెంత!శ్రీ రామభక్తాగ్రణీ! రామదూతా! నమో లక్ష్మణ ప్రాణ దాతా! నమో జానకీ శోకనాశా! యటన్నన్ మహా వీర! నీ డెంద ముప్పొంగదే! యాంజనేయప్రభూ! నీదు నామంబు ధ్యానించినన్  నీదు రూపంబు భావించినన్ భూత భేతాళ దుష్ట గ్రహానేక బాధల్ ,మహాశతృబాధల్ నశించున్ గదా!నామ పారాయ ణానంద చిద్రూప! శ్రీ కేసరీపుత్ర!సౌందర్యగాత్రా! మహా చిత్ర చారిత్ర ! శ్రీ మారుతీ ! దేవ దేవా ! సదా సత్య సంకల్ప! నేనల్పుడన్!నా దు  దోషంబులన్ సైచి పాపంబులన్బాపి రక్షింపవే దుష్ట శిక్షా ! నమో భక్తరక్షైక దీక్షా ! విపక్షౌఘ శిక్షా !సదా రామ పాదార విందార్చనానంద చిద్విగ్రహా !భక్త మందార !యో వీర !యో ధీర ! యోదేవవంద్యా! జగత్ ప్రాణ పుత్రా !లసద్వజ్రగాత్రా ! సుచారిత్ర మాం పాహి ! శ్రీ అచ్యుతారాధితా ! భక్త నేతా ! నమస్తే  సదా రామ భక్తాగ్రణీ! కీశనాధా ! నమస్తే !నమస్తే !నమస్తే ! నమః !